ياعيال دوكم لحيتي كلها شيب
قصيدة قويه هناك اختلاف على قائلها وهي :ـ
قال الذي يقرا بليا مكاتيب ياللى تقرون العمى من عناكم
ياعيالى اللي تشرفون المراقيب تريضوا لي واقصروا من خطاكم
خوذو كلام الصدق مابه تكاذيب مثل السند مضموم للي وراكم
ياعيال لاصرتوا ضيوف ومعازيب ترى الكلام الزين ملحة قراكم
وتروا السبابة من كبار العذاريب وهرج البلايس مايطول لاكم
المذهب الطيب فهو مذهب الطيب والمذهب الخايب يبور نساكم
ياعيال ماسرحتكم باللواهيب ياعيال ماعمر المعزب ولاكم
ياما توليت القبايل تقل ذيـب من خوف لاينقص عليكم عشاكم
وياما قطعت الفيافي العباعيب ندور من صيد البراري غذاكم
ياعيال دوكم لحيتي كلها شيب هذا زمان قعودنا في ذراكم
قمت اتوكا فوق عوج المصاليب قصرت خطانا يوم طالت خطاكم
عطوني القرضة عليكم مطاليب عطوني القرضة جزا من جزاكم
لابديوم عاويا دوني الذيب بالقبر ماافرق طيبكم من رداكم
مانيب فاضحكم بوسط الاجانيب باعمالكم يدرون كل اقرباكم
لو كان تدرون الردى والمعاييب صرتوا مع المخلوق مثل خوياكم
خوالكم بالطيب تروى المغاليب ولو تتبعون الجد محد شناكم
يالله عسىاعماركم شمسها تغيب يعتم قمركم ثم يظلم سماكم
ياعلكم في حاميات اللواهيب ياللي على الوالد خبيث لغاكم
شفت الجفا والحيف والغلب والريب بطلوعكم لابيض الله قراكم
اخسوا خسيتواياكبار اللغابيب اهبو هبيتو يقطع الله نماكم
