حروفه تحمل في طياتها أعمق معاني الرومانسيه الرقيقية
ماإن يخترق جرسها طبلة الذهن حتى يبدأمفعولها في النفوس
وتفعل بها ماتفعل من العبث في مكنوناتها
يلتقط بحرفنة وإحساس كل ماهو جميل
فيلسوف ومفكر يفرض نفسه بقوة ولانملك الا الإذعان
عنيد لا يشبه الا نفسه
ابن تبوك ..
الشاعر المدرسة : حمدان بن تركي العنزي
وماحبي لتبوك إلا لأجله، شاعرٌ مثله حريٌ بنا أن نحب كل مايتعلق به
لأنها ليست عادية من عاش فيها تركي
لا وربي ليست عاديةً من أنجبت تركي
فهنيئا لكِ من الأعماق ياتبووووووك
إليكم غيضٌ من فيضه ..
الهنوف
الهنوف اللي خذت قلبـي وحطـت لـي بدالـه
....... جنح ٍ طير في الظلوع العوج له روحـة وجيـة
كنها من حـور جنـات السمـا حسـت ملالـه
....... وارتمت للارض .. مشتاقة .. وضمتهـا يديـه
في محبتهـا يجـوز العقـل وتجـوز الجهالـة
....... لحظة ٍ قبل انبعاث الديـن .. عقـب الجاهليـة
وادري اني غارق ٍ فـي عشقهـا حـد الثمالـة
.......واترنح ! والخفوق من الغوى .. له الـف نيـة
خافـق ٍ بيـن انحنائـه فـي هواهـا واعتدالـه
.......كنه اللي مـال طربـان ٍ بصـف السامريـة
!
كيف ابحكي للورق عنها وهي شي استحالة !؟
.....كيف ابوصف نهر من فتنة على متن برديـة؟!
كن ضحكتهـا مـلاك ٍ يطـرد الغيمـة لحالـه
.......لابس ٍ ثـوب ٍ ردونـه بيـض واطرافـه نديـة
وابتسامتها .. صباح ٍ يعبـر المـا مـن خلالـه
.......وارتباكتها .. صباح ٍ جت علـى بالـه عشيـة
عنجهيـة فـي سوالفهـا .. وتلحقهـا عجـالـة
.......آآآآه يـا زيـن امتـزاج انفاسهـا بالعنجهيـة !
كن ربي يوم سـوى الخلـق ..سواهـم جمالـه
.......لاجل تمطر غيمة التاريخ من حول الصبيـة
ماتعارفنـا مثـل بعـض المحبيـن برسـالـة
....... لا .. و .. لا هاديتـهـا وردة وردتـهـا عـلـيـه !
التقينـا لان رب الـكـون قــدر لامحـالـه
........أن يرى التاريخ عشق اطهرمن اطراف الخطيـة
حكايات هيفا
حكايات هيفـا مثـل الايـام كـر وفـر
............. وضحكـات هيفـا كنهـا الجـود والمنـه
وفي منتصف ليلـة أحـد عاشـقٍ مغتـر
............. اظنـه أنـا وبنـيـةٍ تـنـزع الـونـه
سهارى نغني ساحل الشـرق .. والمرمـر
............. على الشط يرقص مع سواليفنـا .. كنـه :
سحاب السمـوات العلـى طـاح واتكسـر
............. على الأرض يبغى طفلتـي تقتنـي منـه
هكا الطفله المستمسكه فـي زمـان ٍ غـر
............. إلى مست المـوج ازبـد المـوج بالحنـه
والى مر في سلسالها ومـض نجمـه مـر
............. تقـل روح مسلـم شالهـا البـرق للجنـه
حنونه .. ولا انسى لحظةٍ .. لا ذهب لا در
............. عصافير واقـداح ومسـا ضاحـكٍ سنـه
ولا انسى ودمعي في يديهـا كأنـه سـر
............. نويت اكتمه .. لكـن بكيـت ودرت عنـه
كأن الدمـوع اسقـت يديهـا نبيـذٍ حـر
............. سرى في جسدها واربك الفرض والسنـه
كذا حب هيفا .. لو بـدى للأغانـي مـر
............. يجي فيـه سكّـر .. ليتهـا كثـرت منـه !
ورده
تحلـم بـوردة تحضـن عيونـك فـجـر
واحلـم بـوردة كـل صبـح تقبـلـك !
وردة .. نداها .. يستحي منـه المطـر !
وردة .. شذاها .. مثـل حبـي يشملـك !
دورت عنهـا .. واسـأل دروب القمـر !
إسأل صباح الارض والمـا .. واسألـك !
كـل الـورود استاهلـن كــل البـشـر
أما انـت مـا مـن وردة ٍ تستاهلـك !!
من قبل لا انسى .. كنت ابحكي لك خبـر
عصفور لـه مشـوار مـع ورد الفلـك !
قال : المدينة .. تسرد احلامـك حجـر !
سافر إلى الغيب .. انتفض مـن منزلـك
قلت : الطريق ؟ .. ومد لي صمت وسهر !
فكرت اعود .. وقال : من عـود هلـك !
سافـرت .. لكـن بيـن رغبـات وحـذر
صاحبت خوفي .. كنت خايـف يشغلـك !
للغيب كنت امشـي .. ولكـن مـا خطـر
.. في بالي اني عند ما آصلـه آصلـك !
أثرك حبيبـي تحضـن عيونـك فجـر ؟!
واثـر المرايـا كـل صبـح تقبـلـك !؟
وتريـد منـي أجـمـل ورود البـشـر ؟
وشلون .. ياتاج الورود اهديـك لـك ؟!!
الشــمعـــــــة
ضويت الشمعة الحمرا .. مثـل فكـرة
ولاعبهـا النسيـم .. ولعبـه يسلـي !
يخليها .. وترفـع راسهـا .. كبـرة !
ويلفحها .. وتحني راسها .. تصلـي !
وقام الضي يرقص .. داخـل الحجـرة
يفز وينحني .. ليـن ارتبـك ظلـي !!
كأن الضـي .. طفـل بسكتـه عثـرة!
أو ان الضي .. حيـن يحـط ويعلـي
فراشة من ضيا .. ما صادفت زهـرة !
وانا صادفت غربة .. مثلهـا مثلـي !!
فراشة ضي .. لا لا .. شرشف القمرة !
يهفهف .. والنسيم يغيـر .. ويولـي !
ويشتب الفتيل اكثـر .. مثـل جمـرة
واشوف الشمعة الحمرا تناظـر لـي !
وتذرف دمعها .. قطرة .. ورى .. قطرة
وانا ادري مابكت من همـي وغلـي !
ولو تبكي .. على مابي مـن الحسـرة
تناثر دمعها .. مثل المطر .. لاجلـي !
الا يـا حيرتـي .. والليـل ياكثـره !
علام الشمعة الحمرا .. بكت قبلـي ؟!
أنا مبطي جريح .. وبنجـرح بكـرة !!
أنا عفت الزمان .. وعافنـي خلـي !!
أنا كلـي حزيـن .. ولا قـوت عبـرة
.. توادع ناظري .. تبكي على كلـي !؟
ياليت ابكي .. ياليت اعـود للفطـرة !
وانا ادري جفني بدمـع القهـر مملـي
ولكن حيلتي .. من عزتـي .. زفـرة !
أنـا مـا اريدهـا .. لكنهـا تسلـي !
لو احبسها .. تقيد الشمعـة بكبـرة !
لو اعتقها .. تعود الشمعـة تصلـي !!
مع التحيه
