رداً على الشاعر ابو سيـــّاف
بسم الله الرحمن الرحيم
اولا لااعد نفسي شاعرا وخاصه بين النجوم اللتي يزخر
بها مضيفنا ولله الحمد
فتفاجأت باسناد الشاعر ابو سياف تلك الرائعه لي
قصيدة ابو سياف
ويسمح لنا الشاعر اذا حصل قصور
[poem=font="Simplified Arabic,5,burlywood,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
حي الذلول اللي لفت في محله=ركّابها معزب...وانا اليوم ضيفه
الدار داره....والعرب عادتٍ له=تكرم جناب الضيف لو سل سيفه
كرامته عند المواصيل "دله"=ياخذ من اكناف المعاميل كيفه
ويرتاح من عقب السفر والمذله=ذل الطريق اللي ضفافه كليفه
ومن عقبها كبشٍ لزومٍ نتله=للضيف حق....وللسناعيس صيفه
عادات ربعي...والولي شاهدٍ له=بديارهم تلقى المسايير ريفه
من عقبها جبت القلم والسجله=اخذ من الجزله واعدي الضعيفه
ياراكبٍ حمرا من البعد تله=منهو نوى شوفة منازل وليفه
تشلع كما الشيهان في هدتله=اودع مجاميع الحباري كسيفه
"يفرح بها" منهو نوى دار خله=من بينهم حلّت ديارٍ مخيفه
"ويفرح بها" منهو قضى غربتله=عن دار ربعه غاشي القلب حيفه
اليا تذكر بالملا عزوةٍ له=اقفت دموع العين تدفق ذريفه
"ويفرح بها" الغزاي في ساعةٍ له=بالساعة اللي حزة الموت شيفه
لاقبل على طرش العرب ثم "شلّه"=وقفى بشيبات المحاقب خطيفه
وشاف الفزوع اللي نوت طردتله=واقفى على الحمرا...سريعٍ نكيفه
من دونها فزعة هل الخيل كلّه=عجزوا يجيبونه....وقفت معيفه
هذاك حلّه وان طرى ذكر حلّه=يوم المغازي....والسيوف الرهيفه
وياللي نويت الدار كانك تدله=وقف دقايق... خذ رد الصحيفه
تقبل على بيتٍ ينابيك ظله=يشدى لزمّات الجبال المنيفه
في مجلسٍ من عاوده مايمله=هل المكارم....والقلوب النظيفه
ياجيت ابو سيّاف... بالله قله=سلام ياشوق الفتاة العفيفه
جاني جوابك...والضماير عونله=واشوف ذيب القلب خطرٍ هريفه
انا قريت القاف يالقرم كله=جزلٍ مشده....والمعاني ظريفه
دنياك هذي يافتى الجود خله=ياصار ربحه من نصيب "الهديفه"
قبلك من رجالٍ مضت من فطنله=منهو "بخصها" يالسنافي يعيفه
دنياك هذي للاجاويد عله=تبدلت عقب الربيع بخريفه
وصلاة ربي عد حرف المجله=وعداد دورات الشتا مع مصيفه
على النبي اللي بطيبه محله=دارٍ حوت قبره عساها مريفه
عسى جناب القبر سحبٍ تبله=وينبت خضار العشب مثل القطيفه[/poem]
