المجمعه وامير حائل

في سنة 1299للهجره قام عبدالله الفيصل ومعه جيشه بمحاصره بلده المجمعه فاستنجدو اهل المجمعه بأمير حائل محمد الرشيد ففزع الامير محمد الرشيد ومعه جيشه فقام معه حسن ابن مهنّا امير بريده فعلم عبدالله الفيصل بهم وهو ينسحب الى الرياض وهو يدخل الامير محمد الرشيد المجمعه ويعين سليمان السامي امير عليها وفي سنة 1301للهجره حاول عبدالله الفيصل ومعه جيشه استعاده المجمعه فأتى الامير محمد عبدالله الرشيد وصارت معركه ام العصافيروهي من كبار المعارك التاريخيه في الجزيره العربيه بين( الامير محمد عبدالله الرشيد ومعه اهل حائل وشمر وحسن ابن مهنا ومعه جماعته )وبين (عبدالله الفيصل ومعه عتيبه واهل الوشم واهل سدير واهل الرياض) وانتصر الامير محمد الرشيد وقتل في هذه المعركه تركي بن عبدالله بن تركي ال سعود و عبدالعزيز ابو بطين وعقاب بن شبنان بن حميد من شيوخ عتيبه فقال الشاعر محمد الهويدي من اهل المجمعه قصيدته التاليه:
حرٍ شلع من قصر برزان ملموم ......مخالبه بالصيد درعٍ دوامي
شهر بجنحان السعد وادرج الحوم......إمّا على (.....) وإلا فيامي
وإلاّ على الخرمه بها أشراف وبقوم...... وإلاّ على إبن قويد يم اللدامي
ِفنْ طاع شوري قلت له راي وعلوم......إنه يخيّم في منازل دهامي
ويجر عودٍ طايحٍ تقل مسموم .......اللي عليها طول يدها سنامي
قطّع غروسٍ به للأجواد معلوم........خشرٍ به الايتام هم والعمامي
من عقب كون ام العصافير دمدوم......عقب الصعوبيّه مشو بالخزامي
الملك في يد خالق الناس مقسوم.......والحكم إعطي لمحمدٍ واستقامي
كلٍ ثبت عنده من الناس معلوم...... انه خليفة نجد هو الامامي
ماحدّرت صنعاء الى حد لملوم..... خذها بضرم مصقّلات الحسامي
مرجف مقام الترك والفرس والروم.....ولانت له ارقاب العصاة العدامي
ختم السعد من بين أحجّاه مرشوم.......نطلب لنصره باليقظ والمنامي
سقم الحريب الى إعتلى فوق علكوم....ونادى مبارك للدليله شمامي
وصفّو ورى الحاكم مناعير وقروم.....من فوق هجنٍ يقطعنّ المظامي
وخيلٍ تعفش القاع والضلع وحزوم.....كتايب مثل الجراد التهامي
جموعٍ تزبّر كنّه المزن مركوم......عرايضٍ جت من جنوبٍ وشامي
يتلون من ياخذ على الوزر مرسوم....كل العرب لأمره ونهيه نظامي
فرز الوغى من عادته يرذي الكوم.....جسرٍ على قطع الخروم المهامي
َجرْ السرايا نادر العز شغموم.....اللي بغزواته يعزل الجهامي
شيخٍ يصل القوم صلٍ على القوم.....ويجمع غثير الماطلي والكتامي
وتلقى الدخن من فوقهم تقل مطموم....يوم السميدي مثل صب الغمامي
هذا ذبيحٍ وذا طريحٍ ومكصوم.....وهذا يشاري والسبايا حوامي
كل البدو َخذْها بتخاصيص وعموم.... كم حلةٍ من فوقها الطير حامي
وحياة خلاّق السماوات وغيوم......ماجعل للمسند وبنّا الخيامي
شيخٍ فعل مثله ولا شيخ خرطوم.....اللي على الكفّار بالدين قامي
من خالف أمر الضيغمي حارب النوم.....منول بأخو نوره منيس العلامي
نفّج دغيّم مخمرٍ تقل قيوّم.....وعنى وجنّب عنه وافْ الذمامي
وتناول المقحم مع الشط تسلوم......وتعلّمن ذروات قطع القرامي
يبغن ِبشِر بين المواذين والكوم.....وفاضو مع الضلعان يم الوسامي
جوهم عسوسٍ قالو العشب كيهوم.....شفناه بفياض البساتين زامي
مشى عبيد الوايلي إبن كلثوم .....ولا يخصّصون شيوخهم بالأسامي
وأومُو لصقاّر العلف فوق مزموم.....حرٍ مقانيصه بهم كل عامي
وجاهم من الخضرا على الطُعم منهوم....وورّد لزينات المياه الضوامي
وحاول وقلّط وقدّم الصبر زهزوم......وسرى وصبّحهم بدمٍ وندامي
جاهم بلاهم بالع الحوت لاهوم......اللي معوّدهم بقطع الجثامي
وخذْهم محمد بالنقى ما بها لوم........وجاهم على القادي رفيع المقامي
حاشاه عن كل المثاليم معصوم......وملك بسيفه نجد ووفّى الكمامي
والشرع حطّه بين ظالم ومظلوم.....وشفنا السفر وإنجال عنّا الظلامي
بعيشٍ وأمنٍ وأمّن السبل وسلوم......واودع ذياب الفرس ترعى الغنامي
من خلق نوح وما تناسل الى اليوم....ماساد مثله لا وربّ اللأنامي
اللي جمع حلمٍ وفضلٍ ومفهوم......وكل الخصال الوافيه بالتمامي
ِعزْ الصديق وزبن من جاه مظيوم.....وخزْن الضعيف اللي يدور الحطامي
إن َقلْ وبْل الغيث والزاد معدوم.....والمرجله ماتنشرى لو ِتسامِي
ننصى محمدٍ عنده الخصم ملزوم.....فوق الشحم عيبد يصّب الإيدامي
تلقى المناخ من المراكيب مردوم.......سبع اللّغه بين العرب والطغامي
يسرع ويبطي عنده الضيف محشوم.....وكلّن يشرّع في غزير الجمامي
إلاّ ويعطي الخيل والجيش وهدوم.......أمره ونهيه حاضرٍ بالتمامي
عساه من تقبل صلاته مع الصوم.......وعسى هبوبه كل يومٍ ولامي
يستاهل اللي تنقش الخد برقوم........مثل المهاة اللي ترّبْ العدامي
رزّيت راياته على كل مرجوم.....من هجره لمشيبه لباب السلامي
واللي صحيح الراس ماهو بمنجوم..... يطرب لعِزْ محمدٍ بالمقامي
يالله عسى صلْبٍ نشى منه مرحوم......وغيره تعقر البيض زرق الوشامي
إلاّ حمود اللي كما الدرع مضموم.....سيفٍ الى أهوابه يقصّ العظامي
مراجله ماهي تصنّع وتعلوم........بان السعد به قبل يفهى الفطامي
وقولٍ بلا فعلٍ ترى الكذب معدوم.....مستقصرٍ ماأحصيت فعل القطامي
قلته وانا منهم ترى الفرق معدوم ......تجمّلو معنا جديدٍ وعامي




ملاحظه هامه:
هذه القصيده وجودها هنا فقط للتاريخ وليس معنى نشرها أننا نؤيد بعض الألفاظ مثل (معصوم) فالعصمه للنبي صلىالله عليه وسلم فقط
اخوكم خالد الجعفري ـ حائل

[align=center]الله الله قصائد بالفعل نادره من النادر / خالد الجعفري ، أدام الله هطولك العذب بيننا من معارك وقصائد خاصه بـ ( المهّاد ) الأمير : محمد بن رشـيد ..

تحياتي لك يا السنافي ولا عدمنا مواضيعك التي أثلجت صدري بالفعل ..

أخوك المتعصب تجاه شمر / بندر الشمري ..[/align]

[align=center]تسلم والله يالجعفري

دائما ماتتحفنا بالجميل

لاهنت[/align]

[align=center]تسلم يامخلب:)

مثل ماقال اخونا بندر

لا عدمنا مواضيعك التي أثلجت صدري بالفعل ،،،

سلاااااام ...
..[/align]

اخواني (بندر ومشعل وراعي الوقيد) وش حنا عندكم الله لايهينكم على المرور والتعقيب مشكورين




اخوكم خالد الجعفري ـ حائل

الأخ/مخلب ,,,كل الشكر والتقدير الما تقدمه
الماضي جميل بكل قيمه فلنحافظ على ماقدموه السابقون .
ونطلب لهم الرحمه والمغفره

مشكور يالأمسح على المرور والتعقيب وعز الله انك صدقت لابد من المحافظه على التاريخ




احوك خالد الجعفري ـ حائل