أم الفضايح...مناكد...إرهابي ومروج!!!
السلام عليكم ورحمة الله وبركاته...
الفضيحه...
سلام الله عليكم يا أهل مخيم الخفجي أنتم وفضايحكم اللي كلها وناسه...وسعت بال...
هذا ماهو شين عند اللي صار لي...والسالفه طول الله أعماركم بطاعته...
إني بهاليومين اللي فاتن رحت لحايل عندي شغل...(((ماني معلمكم به)))...
وأنا راجع أخبر مسبوعين الأبو اللي بام سدره يتقنصون الناس...وخذيت حذري منهم وصرت أمشي أقل من 120...
المهم وصلت عندهم إلا وهاكالوجه الغبر يوم انطلق يمي...وعلى طول... إثباتك... إثباتك... إثباتك...!!!
بسم الله الرحمن الرحيم؟؟؟
وأعطيه الرخصه...ويطالع له...وهو يقول الإستماره...
وهو يطق جنيي...قلت انت وش تبي بالإستماره...
قال أقول لك الإستماره...
قلت انتم ماعندكم سالفه...
يوم انا أمشي 160 ماحدٍ وقفن واللي يماشوونن وقفوهم...ويوم صرت حذر ولا تعديت الـ 120 تبون رخصه وإستماره...
وهو يلتفت على خوياه وهو يصوت له واحد...يوم جا الا والرشاش الأمحق معه ومتولم...
قال هالحين اصفط على جنب...
يوالله النشبه...
يلعن ابو الذله...
والبق ويجي تقل وجه (((...ماني قايل...)))...
يالله إنزل...وأنزل...إرفع يديك فوق...
هاه وشو لوه؟؟؟...
نبي نفتشك...
كيف تفتشن؟؟؟قال لاتطول الهرجه؟؟؟
الشكوى لله...اللي مقويه هالبلية اللي معه رشاشه!!!
وهو يفتشن تفتيش شخصي...قدام الرايح والجاي...
ومن مر يطالع...
وأكيد من شافن يبي يقول هذا إرهابي أو مروج مخدرات...
ويرثعون بالسياره...ويقلبونه...ولا لقوا الا سد باب اللي جابوهم...
قال هالحين تبي تجيب الإستماره وإلا لا...
بس انتم وش تهقون انا عطيتهم إياه وإلا لا؟؟؟
أكيد اعطيتهم إياه وبدون كلام مادام هالرشاش مهوجهٍ لي لو يبون السيارة كله...
إستنتجت من هالموقف ان اللي يهاجمون نقاط هالتفتيش ماهم كلهم إرهابيين؟؟؟
ولكن مثل هالحقود اللي يستغل الصلاحيات اللي ماهو قدها يخلي الناس تكرههم ويمكن ان الواحد يتهور ويسوي شي يندم عليه...
ختاماً...اذا جيت نقطة تفتيش عطهم كل الأوراق اللي عندك بالدرج حتى أوراق طلبات المطبخ...قبل مايطلبون اي شي...
لا ولازم انك تلزم عليهم...وتحلف عليهم بعد!!!
والا تصير شبهه للرايح والجاي...
بس أحسن شي الدغدغه خص ليا صرت طفشان...
واللي احسن منه اني سلمت من كيمرة الربع اللي يدورون الفضايح أمثال الشبث...وابو سلطان هاللي يهددون به هالضعوف...!!!
