سالفة ... راعي الكابرس .. لاعادت
السلام عليكم
اخواني الكرام
حياكم الله جميع
الليله البال رايق
وطرت علي سالفة خوين لي يوم سوا حادث بالكابرس
خوينا هذا لوه جبهتن كان تخبرون الصكوك الاوله ( القديمه )ابد تمد الصك على جبهتوه وتقراوه
عاد انتم تخبرون حفريات الله يكرمكم الصرف الصحي اللي بصديان قبل كم سنه
خوينا هذا ( ابو جبهتن عريضه ) ساري من الاستراحه تالي ليل
وهو عاد اخبروه يذل من معزبتوه ايه عينه حارتن عليه ومذيرتوه المسيكين
الوكاد سرى وهو يجيك موحفن قبل لا يقفل عليه دفتر الحضور
وهو متوجهن لبيتوه ومع طريق صديان وهو ينطحوه اكالجذع طايرن بين السما والقاع
وجه لوجه ( الطريق الثاني مصكر بسبب الحفريات )
يبي يروغ ماش ما يمديه طااااااااااااااااااااااااااااااااااااااخ لا والله الا طخت قوووووويه
انطلقن الملويات ( الوسايد ) من الدركسون وتنشلع قبلهن طباقتهن اللي مكتوبن عليه شفروليه
وهي تصكوه الطباقه على جبهتوه الا وهو من صيد امس
وهم يتراكضون الناس على الحادث ويفتحون باب سيارتوه وهم يغلغلونوه من حدر الوساده
وانكتم نفسوه وهو يقوم ينخا
ويالله يجيب لوه اكالنشاط وهم يجرونه من حدر الوساده
ويودونوه الاسعاف وهو بين الحياة والموت
انا يا محاتسيكم مادريت الا ثاني يوم ونا ازوروه بالمستشفى
ويوم دخلت عليه وشفتوه الا على جبهتوه مطبوعن عليه c h e v r o l e t
يعني كلمة شفروليت اللي على طباقة الوساده
وسلامتكم يابعد حيي
اخاف اكمل السالفه وعاد يعرفوه بعضكم ( نتوقف لزوم خصوصية الموضوع ) .
