وراح ... عبدالله...

[poet font="Simplified Arabic,4,black,normal,normal" bkcolor="white" bkimage="" border="ridge,4,black" type=2 line=200% align=center use=ex length=0 char="" num="0,black" filter=""]
مؤمنه بالله وايضاً بالقدر خيره وشره=وادري ان اللي كتب للنفس لا بد ويجيها
والعيون اللي تهل دموع من حر ومضره=ماترد الغالي اللي راح والروحه مابيها
لكن أمر الله حصل وأمر الله المؤمن يسره=ماكتب له خير لو كل الشرور يعيش فيها
والمصيبه يحتسب لا جت ولو شكواه مره=والمنيه ... واصله والكل منا محتريها
وراح (عبدالله) عسى الجنه حبيبي هي مقره=طفل في سادي ... بري ... كل البراءه محتويها
يعتزي ببو غريب .. إلا غريب ذقت حره=يكتبه دايم على كتبه وأنا أقرا اسمه عليها
ويكتبه في شاشة الجوال ... وأحيان ايتشّره=إيه أنا يمه ترى رجّال والصعبات أجيها
وش تبين اللي تبينه يا ( أم عبدالله) نجره=أسحبه عندك هنا ... والك السعاده نشتريها
و((الرياض)) .. اليا كبرت انتي وانا يمه نفرّه=واشتري سيارةٍ ... واقول ياعمري اركبيها
واخذك وندور انا وانت ... ولاش احداً نطره=وإن تعبت أقول لك يمّه مقاضيك إكتبيها
آمري بس آمري ... وشراع طاعتكم لاشرّه=وأي حاجه يا ( أم عبدالله) على بالك خذيها
أضحك اليا قالها ... وانا ادري الدنيا تغرّه=طفل مايدري من الدنيا واللي يدور فيها
يحسب الدنيا على كيفه تجي له أو تمره=وأحسبه تمهل له الدنيا ولفعله أرتجيها
ويحسب الأيام تضحك له على طول وتسره=واحسبه دايم معي جالس وجلسته اشتهيها
يحسب آماله تحقق له عسى الله مايضره=وأحسب آمالي تحقق فيه وأيامي أحتسيها
يحسب علومه اليا سولف بها وصل المجره=وأحسب الدنيا اليا سولفت له طيت أمتطيها
كان فعلاً باراً بي والكل يشهد له ببره=أقرب عيالي لقلبي والمروءه معتليها
كان شمعة عالمي والنفس عقبه مكفهره=كان وردة دنيتي كل المكارم مهتويها
كان ينبوع الحنان وفي خيالي كان دره=كان سلوة خاطري وعيوني اللي اشوف فيها
وكان ( عبد الله) إذا شخّص لبس ثوبه وزرّه=وكان له غتره تنشّى واضح المرزام فيها
ويلبس عقاله حبيبي لا بغى (بندر) يمره=ولا أخذ شوي رمى الغتره وجاني يشتكيها
كان في عمره طفل ... وبشيمته كبير مره=مايحب الشين مايرضى المهونه ... مايجيها
يجبر الله كسر قلبي يقلب أحزاني مسره=لاذكرت انه من طيور الجنان ومن بنيها
ولا ذكرت انه شفيعٍ ولو في الألف مره=أرجهن وأقول به نفسي عن النار احتميها
وأحمد الله كثر مافي الكون من مثقال ذره=يالله الجنه واجي فيها مع الي ساكنيها
ولا جلست الحالي أقول : الحياة ومستمره=وكل مولودٍ ولو عمّر حياته معتريها
وأقتنع وأقول يادنيا الفناء ... وهلمّ جرّه=والطريق اللي مشوه جدودنا حنّا عليها
مايدوم الا الكريم ونفس عبده مستقره=واشهد ان الله حق وقسمته انا ارتضيها
واشهد اني مؤمنة به والقدر خيره وشرّه=وكل مكتوب ترى للنفس لا بد ويجيها



اسيرة نجد

[/poet]

صح لسان أسيرة نجد

وسلمت أنامل نوف

<<< مو جاي علشان العنوان

:)

أختي العزيزة

نوف

لكي كل الإحترام والتقدير

[ALIGN=CENTER]اخي العزيز

المهيني

مرورك راقي برقتك سيدي

لا تحرمنا منه في المرات المقبله

تحياتي
اختك...نوف[/ALIGN]