سؤال ونبغى الاجابه لو تكرمتوا

مسيتوا بالخير يالربع...انا ولو تكرمتو بغيت قصيدة العونى فى المغزى الى صار بين شمر بقيادة اللأمير سعود بن رشيد وبين بن صويط والى راح من الظفير فيها حول 1600 رجال .وجزاكم الله خير

الأخ العزيز الشحمان

حياك الله بين أخوانك وعيال عمك ... والله يمسيك بالخير والمضايف نورت
بوجودك، أما طلبك فغالي والطلب رخيص

والقصيد ةاللي قاله الشاعر الكبير محمد العوني في ذلك المغزى على الضفير
وهاذي القصيدة كاملة

يقول العوني:-




[poet font="Simplified Arabic,12,darkblue,normal,normal" bkcolor="" bkimage="" border="double,4,gray" type=0 line=200% align=center use=sp char="" num="0,black"]

كابر وفاخر هل الدنيا وفاخرها = يطفي لظى مطفي الهيجا مفاخرها
تراك إلى طريت ذكره تشهد الملا = جميع فهامها بدوه وحاضرها
أن الثنا منبعه واصله ومنبته = لسعود ميراث جدانه ذخايرها
أن دلت الناس منهم مسلكٍ معا = واسترشدت من بصايرهم بصايرها
أسس لهم صورته عبدالله الباعث = مكارمٍ عمت الدنيا نوادرها
سادث بنثر الحمر والحمر ثم الندى = ارسى فخرها وغنت بها منابرها
واوصى بعده لسادات من بعده = أعلى بنا مجدها واعلى منايرها
وطالع بطالع سعودٍ حسنه الباهر = واصعد على منزل المريخ زاهرها
أهرج وبالغ عنه ولا حرج = حدث وزد فيه وعوجو لي معاذرها
أن جيت ياركب ردوا لي رقابها = تلو براها عسى البيضا سفايرها
مقدار ما قول وابلغكم على الشكوى = مظلومة سافرت تشكي لناصرها
وإلى حفظتوا معانيها فشانكم = كفاكم الله ماخفتوا شرايرها
سيروا على هربٍ مثل الفحول الها = عامين مالح عضو الكور أباهرها
من عد كبشان إلى القرعا إلى الحجر = ترعى نبانيب ماتشتهي خواطرها
لما بنى فوقها مثل التلول نياً = قلت أوجب الشان لاتنهون زاجرها
والصبح من الدفنه حطو ميامنها = نبعه وبصوه يسارٍ من محاصرها
والرابعه راس جلدية زمالكم = وخشوم سلمى وأجا بانت لناظرها
والفن نهار خامسه برزان بغيرونا = سقاه مهبل حقوقٍ زان ماطرها
حلن بدار الصخا والهيبه الذي = منها جميع الملا ترجف ضمايرها
قومٍ تعنوا بشأن الخلق واوقدوا = نارٍ بالارواح ما تطفى سعايرها
من خالف الحق بامر الله عقوبته = بايمناهم كاتب الدبرات ماهرها
دولة سعود النقى والمجد والوفا = بالعهد والعقد وطواله وقاصراها
اهنيكم يامناديبي بشوفكم = عينٍ يفكر بعين الله ناظرها
ومصافحتكم لكف تسفك الدما = والفضل والجود فيضٍ من خناصرها
ياطالما اجارات المضيوم واجبرت = خواطر حدت الحاجات كاسرها
ياركب بعد السلام بدوا رسالتي = وهو عليهم بخافيها وحاضرها
قولوا له الراجي الشاكي شكا وابلغ = عناك والناس عن شكواه عاذرها
معناه ما يقدره غيرك ويدركه = أنت الذي بالجدى والجد قادرها
غنايمٍ شتت الرحمن جمعتها = مصالحه فارقت وبقت خسايرها
ابغا الخلف والعوض يالفاهم الحازم = ببضاعةٍ منك ماكسدت تجايرها
ياكاشف الليل صبحٍ والنهار ادجى = للخصلتين التي لازال عامرها
من مات عبدالعزيز ومتعب ماتت = واحياه به باعث الموتى وناشرها
عقب ارتحاله عن الدنيا ورغبتها = بطلوع نجمه تنادت من مقابرها
والدين والعدل والمعروف والهدى = وثبات الأقوال لو كبرت صغايرها
والجار والمعسر المهلوك والرملا = لولاه نسخت من الدنيا دفاترها
والسيف هو وأحمر القصدير منزلها = عنده على مقرن الحاجب وحاجرها
والطير والذيب تدعي له من البقا = لولا عواديه مادميت منافرها
وبضد هذا خصالٍ ماتبي غيره = والموجب انه بقيد الذل حاجرها
والبخل والجبن والهزلات والخنا = من نشوته ماسمر بالحي سامرها
والخيل والجيش ماتشكي فعايله = والأرض مظلومةٍ والشمس حايرها
من طلعته ما بدا نوره ولا أشرقت = إلا وعج الرمك والصمع ساترها
والصيد والوحش من بطن الفلا جلا = رهبةٍ من شوفه العظمى وباهرها
تشامرت بالجبال القود وانحازت = بوعورها جندها الجرار حاشرها
الجازم الحازم الصامل على الهيجا = الخايض الغيمة السودا وماهرها
المال معطيه والمطموم باذله = واللبس كاسيه والعثرات جابرها
لو الملا تطلبه يوم حوايجه = عطاه ماخبث نفسه وخاطرها
مضوفته دونها ما ياقف الحاجب = والضان والكوم بالساعات ناحرها
أن صار له نايبه أو حل معضله = عينه لذيذ بالوطا ترجف جزايرها
قوض بنمرا غشومٍ سدت الفضا = والحزم والريع ضاقت به معابرها
الموت بحرابها والعز يبراها = والنصر بنحورها والرشد حاضرها
وسعود أميره يامرها وينهاها= زامل مدبر ضحى الهيجا عساكرها
مر على الشام إبن ضيغم يضربها= ومر سهيلٍ تحطه في نواظرها
ومر تنحر مغيب الشمس وايمنها = ومر مثاقل حديد الحصن حادرها
مثل أمس يوم إبن سعدون عنايمه = من ريب الايام دارت به دوايرها
نخا بني عمه الادنين وانثنوا = نخا العرب والعرب خلت سوايرها
ماغير شمر مقمين على العليا = عيوا عليها ولو غليت مساعرها
لكن طرأ للشبيبي قالةٍ فاتت = ذكر علومٍ لهم ماكان شاكرها
وردوا شمام عن ركبه لفزعتهم = بعض الحيا والضغاين ذيك خابرها
ولانفع فعله الماضي ولانفع = صنايعٍ عند كل الناس ذاخرها
وجارت وحارت وقال الرشد وينه = سيروا على الركايب وين صادرها
قلت اركبوا واستعن بالله واعتمدوا = وافرق مغيب الكواكب عن مناحرها
وانحر إلى ذروة العليا وامسكها = اقدوا بحور الندى وش لك بقاطرها
اقصد سعود الرشيد ومسند زامل = صيارمٍ جانب السمرا مواكرها
لله قومٍ ظهر ضيغم معقبهم = ما اسرع على الموجبه دلقه بواترها
ساعة لفينا عليهم قال إبن متعب = عينيك ياطالب النجدة بحاضرها
عينيك يانايخٍ جانا حيثها = ليلة نهاره نجوم الليل سامرها
دعاه شبيب وقال الجيش حضره = وشاشت رجال الجبل ومرو أوامرها
ومر على راعي الخزنة ودبرها = بنجاز ماقال والرايات ناشرها
وثور عقبما انقضى اللازم وسيره = موارى النصر تلفح له بشايرها
ولمت به العزوة الغرا بني عمه = شمر مواريد للهيجا وضادرها
سدوا فضا الأرض كن الرب حاشرها = للحشر باعثها سبحان حاصرها
مطير جابه ولد سلطان إبن مدوش = حاشه من الصلب والصمان وامرها
يتبع رضى مخلف العزمات بن متعب = طيبه تناسب إلى الأفعال شاهرها
لما بنى فوق أبو غار خيامهم = مثل الطها والجموع الكتم حاجرها
يبغى السويطي يجي يطلب مراحمه = محنةٍ مخفيةٍ ماهوب مظهرها
نوة يسويه مع شيخه ويقبله = واللي مضى له من الزلات غافرها
وعيا عليه الدبور وسو نياته = وحظوظ الاثنين واحلام يدورها
واهفاه معروف سعدون وحيره = والنعمة السابقة تهفي برايرها
اغواه إلى نام وجموعه تحاشموا= لفايفٍ جمعت مالله بناصرها
أسرع بهم والطنايا تدفع خطاها = بالسيف غلبا تعجلها مجازرها
نزل بهم دافن نفدٍ محصنةٍ = ماتركض الخيل من هومة زبايرها
واستدرجه صعب الاريا واظهره منها= ودار عقله وقومه عن معاشرها
اغواه باقفايةٍ كنه منه خايف = ليام ظهر بالزراجه من مغاترها
وثب عليه إبن ضيغم وثبة النادر = لا بان له صيدة الطولا يداورها
صكه بكف تلقى خبطته منها = والخير والشر بوسطه من بوادرها
بصط للاصحاب تلقى خبطته منها= والعدو جذ الحلاقم من حناجرها
هاشم بها هامة العرنون من صغره = خمس الجموع إتلفه مارف طايرها
ياليث عينٍ لابن منصور وايقه = تشوف ماشافت عيني بناظرها
بين المغيرا وشقرا ساعة توجب = ياليت سعدون قبل الموت حاضرها
خمسين جمع ولد نايف مشى بها = وسعى سعود الرشيد بقطع دابرها
ابرم عليهم رحا غلبا ودمتهم= ما بقت سوى دارهم تسفى منايرها
وأوما عليهم بخيلٍ ماثنت جمعه= إلا بهاماتهم تاطا حوافرها
مركاضهم من جبار شقرا ومحرفهم = من دفن تنسف ذرايعها عثايرها
ألف وسبعمائة صرعى مطرحةٍ = راحت دماها على البيدا صوابرها
راحت خيول الظفير وخلطهم كنه = هراب ريمٍ رشاش الملح ذاعرها
وجانا حمود بكفه من ثمر رايه = واشرف على حالة الدنيا وصايرها
ماأدري وش انساه أفعال الرشيد أول = اللي عديد الروا ماعاد ينكرها
ولا أنذره صولة النوري وأخو بتلا = جميع وايل وما جرت جرايرها
يوم الجميما دعاه البين وانقادت = وقفت مقاديمها تجذب كسايرها
وغيره كثير من القالات له واعظ = يدري بغلبا ولا تنكر مآثرها
تزلزل الارض والدنيا برجفتها= ارخص لها حاكم بالسيف قاهرها
تظن كن القيامة قامت الضحى = والقاع من سمكها كنه مشاجرها
ابصر بها تيهه مدعوس واشويطر = تف على لابةٍ ذولا مشاورها
هدوا على الليث عصفورٍ يبي صيده = والحمره هامت الضاري بظافرها
واستهجلوا به وسوو عملة الجاهل = اللي على الديد مايحصى شعايرها
تقاربت عنده عينه شوفة السما = واوما بكفه يبي يلمس زواهرها
وحمود مثله رفع راسه ومدها = طمع بزاجر هل الدنيا وناهرها
الحاكم الهاضم الهضام ابن متعب = بدرٍ سطع بالورى واجلا بصايرها
تهدي عليك الملوك المال وتصانع = من خوف يغتاظ بالفيلق يجاهرها
أبوثمانٍ وست ماكمل سنه = وكبار الاسنان والتيجان كابرها
قلته وأنا اكفيه بالله عين حاسده = مني وعن كل حالاتٍ يحاذرها
ماداج مثله على البيدا بفعله = كابر وجاهر هل الدنيا وفاخرها
تمت وصلوا على المختار سيدنا = ماحرك الريح غصنٍ من خضايرها


[/poet]


أتمنى إذا كان هناك أي خطأ في أحد الأبيات توضيح ذلك

وتقبلوا تحياتي
أخــ رافع البيرق ــوكم

عاجز عن الشكر يرافع البيرق ومثل ما قال الامير عبيد"كل ايطرى عزوة له من الناس***وانا اطرى عزوة الشمريه"

الأخ العزيز الشحمان..

ل شكر على واجب، وهذا واجبنا ... وهناك تصحيح قايل هذا البيت
سمو الأمير عبدالله بن علي الرشيد وليس الأمير عبيد .. وهي قصيدة مطلعها

لى دك في قلبي ثمانين هوجاس *** الشازري بالكيس والنار حيه
وقد قالها عند في العراق عندما خرج من حايل بسبب الخلافات بينه وبين آل علي

وتقبل تحياتي
أخـــ رافع البيرق ــوك

اخي العزيز رافع البيرق

السلام عليكم ورحمه الله وبركاته



يعطيك العافيه ولساني يعجز عن الشكر سلمت يمناك لاعدمناك
منتظرين مشاركات الجيده والمفيده