مغامرات برق النفود ( وضاع الصتيمه)
بسم الله الرحمن الرحيم
بعد انقطاع مغامرات برق النفود وذلك لا نقطاعي عن كتابتها ( شوفو الذهانه)
وانا اقدم لكم هذي المغامره امل ان تعجبكم
برق النفود
---------------------( وضاع الصتيمه)-----------------------
في يوم من الايام العاديه نهجت اتمشى وافرفر على رجليني حول المزرعه وطبعا تعرفون معنى ان الواحد يتمشى لحاله اكيد طفشان وبيدي عصى مكنسه مكسور اموح به
وانا اتمشى ياجماعة الخير وهو يبلص اكا الشين بالقاع شي عكس على عيني اشعة ام عميد
(هو ووجهه مايتمشى الا بالقوايل الحر الموت الله من زين المزاج) والله وانا اغير اتجاهي يمه ويوم قربت له وهي تطقن البواهه تدرون وش لقيت فانوس علاءالدين السحري (فانوس مره وحده يالظالم) الوكاد اني ماصدقت خبر وانا ارفعه وانا احت الرمل اللي عليه وانا واقوم افركه وافرك وافرك مار ما حولك احد قلت يمكن من البطى خربان وانا اجرب مره ثانيه يمار ماش الوكاد اني زعلت وانا ادقه بكا الهوداه وانا اييس يوم جيت ابا ارميه وانا المح اكا الشي عند عروة الفانوس وانا ادقق به يمار زر ومكتوب فوقه لطلب المارد اضغط هنا(…؟…) وانا اضغط الزر يوم دق جرس وسط الفانوس (نقوط ثانيات) وانا اسمع حس داخل الفانوس قرقشه وما الى ذلك وهو يطلع لي ولد المارد الصغير
قال : نعم
قلت: السلام عليكم
- وعليكم السلام
- من انت
- الا انت من انت
- انا ابي المارد حق الفانوس هذا
- هاه تبي ابوي
بها اللحظه طلع صوت من داخل الفانوس يقول من عند الباب يا ولد قال الولد واحد يبيك مار وهو يطلع المارد لابس قميص
قال : نعم
قلت: الله ينعم عليك
- وش عندك
- ابد والله سلامتك
- طقيت الباب علشان تقولي سلامتك الله يسلمك يالله ياولدي دخلنا ولا تطلع بها القايله ( يلمح بس برق مايفهم )
وهم يدخلون وانا اقعد افكر شوي بعد الانبهار وانا ادق الجرس مره ثانيه ويطلع المارد
- نعم وش عندك
- ياخي انا اسمع انكم لابغيتوا تطلعون تقولون شبيك لبيك ومدري وشو ياخي وين الكلام اللي يقولون اطلب تجد ومدري وشو
- هاه هالحين فهمت انت تبي طلبات المارد ليش ماقلت كذا من الاول ياخي
- وانا وش دراني
- زين انتظر لحظه
وانا امسكه مع ذراعه
- لا لا لا تعال الله يرحم لي والديك لا تروح انا مافرحت على الله انك تطلع
- ياخي ابا اروح اغير ملابسي والبس ملابس العمل وش بلاك
- بس لا تبطي الله يرحم والديك
- ماني مبطي الحين ارجع لك
- ايه تكفى بسرعه
- طيب يا ادمي
- وش علمك مارحت بسرعه رح وتعال
- وشلون اروح وانت ماسك يدي فكني ياخي
وانا اترك يده
- ماعليش والله اني نسيت تخبر مافرحت على اني ( ترو بها اللحظه المارد زرق برق ودخل داخل وبرق مواصل الكلام وهو يوايق عليه من عند فتحة المصباح )
وهو يطلع المارد معصب مره وقال
- وش عندك توايق
- مدري ماوايقت يابن الحلال متلخبط انا مدري وش السالفه
- لا توايق الله يرحم لي والديك محارمنا داخل
- يابن الحلال انا اسف ماعليش حقك علي
- لا تعطلنا ياخي خلنا نشوف شغلنا
- خلاص خلاص رح انت واوعدك والله اني ما اوايق مره ثانيه ( بها الحتسي زرقه المارد مره ثانيه )
وبعد برهة من اللحظات ( انواع التخبيز) طلع المارد وقال يالله نبداء قلت لحظه ياخي وين شبيك لبيك قال ماهو لازم قلت الا لازم قال هاه شبيك لبيك قلت لا قله كامله
- ياخي ماله داعي
- لا عاد قله علشان الوناسه وتخبر يعني الواحد يستانس لا قال له المارد شبيك هذيك
- وبشئ من دبلة الكبد قال شبيك لبيك خدامك بين يديك اطلب تجد
- …………………………………………
- اطلب تجد
- …………………………………………
- وش بلاك ياخي اطلب تجد
- والله مادري وش اقولك بس انا مدري وش اطلب
- انا لله يعني لا الحين مافكرت وش تطلب
- يعني قلي وش عندك وانا اقولك وش ابي
- جالس في بوفيه الاخ وش عندكم ياخي وش تبيني اسويلك تبي تروح لمكان براسك تبي اصنع لك شي بس اطلب وانا اسوي
- تقدر توديني أي مكان انا ابيه
- حمد لله ليش لا
- حتى لو المكان بعيد
- اسمع يا حبيبي انا ماعندي بعد وقريب ولا انا مثلكم عب بنزين ولا تعبي مافيه ………لحظه بس وتكون بالمكان اللي تبي
- حتى لو المكان قديم
- وشلون يعني
- يعني بالماضي
- بالماضي ولا بالمستقبل كله واحد انت اطلب بس
- والله
- والله البلشه ابتلشنا والله….. ياخي اطلب خلصنا بس
- زين ابيك توديني لعصر الناس القديمين
- أي عصر تبي العصور واجد تبي العصر الحجري ولا العصر اللي عقبه والا العصور الاسلاميه
- بس بس بس وقف ابي العصور الاسلاميه
- لاحول ولا قوة الا بالله أي عصر حدد العصور الاسلاميه له اكثر من الف واربع مية سنه
بها اللحظه تبين لي اني دجه بالتاريخ
- ابي العصر اللي به الفتوحات الاسلاميه
- ياخي قل العصر الاموي من اول ( الربع كلهم داجين بالتاريخ )
- يالله ودن بسرعه
- اصبر ياخي وش علمك عاد الطبلون ياخي هد السرعه طيب قلي متى تبي ترجع
- أي وقت بس بسرعه ابا اروح
- طيب معك شهرين
- أي شهرين ياخي خمس طعش يوم وينزل قرار فصلي خلهن اربع طعش
- طيب هذولي اربع طعش يوم
ماذا حدث بعد ذلك لبرق النفود
وكيف سيتعامل مع هذا الموقف كل ذلك سنعرفه في المغامره القادمه
